مجلس أعلى عسكري بيحكم .. و عايزني اكسبها .. الله الموفق

بقالي كتير ما بكتبش .. ماعنديش القدرة و لا الطاقة و لا الاستيعاب أننا أكتب.. بس النهاردة يوم مختلف .. النهاردة يوم التدوين ضد المجلس العسكري .. العيد الكبير يعني للمدونين ..

المهم أنا من أول الثورة و أنا بيجيلي أرتكاريا من هتاف الجيش و الشعب ايد واحدة .. يعني ماكنتش مصدقة أن الناس مصدقين أن الشعب المصري اللي طالع دينه و الجيش المصري اللي نزل بدبابات عشان يحمي القائد الأعلى للقوات المسلحة وقتها- الحاج حسني مبارك- فى نفس الخندق.. و بعدين لما أمعنت النظر لقيت أن الشباب الحلوية و الضباط الأمامير اللي احنا بنشوفهم فى الشارع و كانوا بيبتسمولنا و ساعات تحسهم عايزين ينزلوا معاك مظاهرة حاجة و المجلس الأعلى للقوات المسلحة حاجة تانية .. طيب هو ايه بقى المجلس الأعلى ده .. مين ام اللهو الخفي اللي بيحكمنا و احنا مانعرفش منه ألا كام اسم يعني ..

المجلس الأعلى للقوات:

حسب الويكيبديا :

المجلس الأعلى للقوات المسلحة هو المجلس الأعلى المكلف بقيادة غرفة العمليات الرئيسية للقوات المسلحة في حالة الحرب وفي الظروف الطبيعية فإن رئيس الدولة هو الذي يرأس هذا المجلس بوصفه القائد الأعلى لقوات المسلحة. أما في الوقت الراهن وتحديدا منذ مساء الجمعة 11فبراير 2011 فهذا المجلس هو الذي يتولى إدارة شؤون جمهورية مصر العربية عقب تخلي* محمد حسني مبارك عن الحكم إثر اندلاع ثورة 25 يناير. يتكون المجلس من ثمانية عشر من قادة القوات المسلحة المصرية يترأسهم القائد العام للقوات المسلحة ووزير الدفاع المشير محمد حسين طنطاوي. أعلن المجلس في 13 فبراير 2011 عن توليه حكم البلاد لمدة ستة أشهر أو لحين إجراء انتخابات مجلسي الشعب والشورى ورئيس الجمهورية، كما أعلن حلّ مجلسي الشعب والشورى وتعطيل العمل بأحكام الدستور في حين شكل لجنة تعمل على تعديل بعض مواد الدستور.

*خدتلي بالك من تخلى دي .. الراجل يعني زهق مننا سبنا و مشي و قال ما يسيبش البلد لحد غريب .. فقال يجيب أقرب ناس لقلبه يحكمونا .. يعني لو مبارك كان راقص باليه كان زمانه جاب البولشوي يحكمنا .. المهم يعني مين بقى المجلس ده مكون من مين :

• القائد العام للقوات المسلحة وزير الدفاع والإنتاج الحربي ورئيس المجلس الأعلى للقوات المسلحة المشير محمد حسين طنطاوي.
• رئيس أركان حرب القوات المسلحة الفريق سامي حافظ عنان.
• قائد القوات البحرية الفريق مهاب محمد حسين مميش.
• قائد القوات الجوية الفريق رضا محمود حافظ.
• قائد قوات الدفاع الجوي الفريق عبد العزيز سيف الدين.
• قائد المنطقة المركزية العسكرية اللواء حسن الرويني.
• قائد الجيش الثاني الميداني اللواء أركان حرب محمد حجازي.
• قائد الجيش الثالث الميداني اللواء أركان حرب صدقي صبحي.
• قائد المنطقة الشمالية اللواء أركان حرب حسن محمد أحمد.
• قائد المنطقة الجنوبية اللواء أركان حرب محسن الشاذلي.
• قائد المنطقة الغربية اللواء أركان حرب محمود إبراهيم حجازي.
• قائد قوات حرس الحدود اللواء أركان حرب محمد عبد النبي.
• مساعد وزير الدفاع اللواء محسن الفنجري.
• مدير إدارة الشئون المعنوية اللواء أركان حرب إسماعيل عتمان.
• بالإضافة إلى مدير المخابرات الحربية ورؤساء بعض الهيئات بالقوات المسلحة.

بعد ما عرفنا أسامي فريق كورال العسكر ندخل بقى على فكرة أن المجلس و أمريكا ايد واحدة ..

المجلس و ماما امريكا :

طيب لا يخفى علينا كلنا أن الجيش بتاعنا مش جيش أكتوبر .. بس ده جيش كامب ديفيد .. جيش ما يقدرش يدخل سينا .. جيش بيتلقى تاني أكبر معونة بعد اسرائيل طبعاً تمن لصمتنا عن اسرائيل و تمن عشان يتراجع دور مصر من الآخر تمن عشان تبقى مصر مش فى قيادة المنطقة و لكن تبقى قوادة المنطقة ..

انفاق المعونة الأمريكية العسكرية :

المعونة الأمريكية العسكرية بتوصل ل 1.3 مليار دولار سنوياً

بيتم انفاقها على حاجات زي دي:

وتبين دراسة تقع في 40 صفحة قدمها مكتب "محاسبة الإنفاق الحكومي" التابع للكونجرس بشأن طبيعة وكيفية صرف مصر للمعونة، ونشرتها واشنطن ريبورت في مايو 2006، أن المساعدات الأمريكية لمصر "تساعد في تعزيز الأهداف الإستراتيجية الأمريكية في المنطقة".

وأوضحت الدراسة أن المصالح الأمريكية التي تم خدمتها نتيجة تقديم مساعدات لمصر شملت أوجها عديدة من بينها:

-سماح مصر للطائرات العسكرية الأمريكية باستخدام الأجواء العسكرية المصرية، ومنحها تصريحات على وجه السرعة لـ861 بارجة حربية أمريكية لعبور قناة السويس خلال الفترة من 2001 إلى 2005، وتوفيرها الحماية الأمنية اللازمة لعبور تلك البوارج.

-قيام مصر بتدريب 250 عنصرا في الشرطة العراقية، و25 دبلوماسيا عراقيا خلال عام 2004.

-أقامت مصر مستشفى عسكريا، وأرسلت أطباء إلى قاعدة باجرام العسكرية في أفغانستان بين عامي 2003 و2005، حيث تلقى أكثر من 100 ألف مصاب الرعاية الصحية.

كذلك أوضح التقرير كيف تنفق المساعدات العسكرية الأمريكية لمصر في شراء معدات عسكرية بالأرقام، حيث أكد أن الولايات المتحدة قدمت لمصر حوالي 7.3 مليار دولار بين عامي 1999 و2005 في إطار برنامج مساعدات التمويل العسكري الأجنبي، وأن مصر أنفقت خلال نفس الفترة حوالي نصف المبلغ، أي 3.8 مليار دولار لشراء معدات عسكرية ثقيلة.

يعني حتى فيه فلوس ما تمش أنفاقها على التسليح ..طيب راحوا فين يعني .. ده ينقلنا على فكرة أن تقريباً جنرالات الجيش بيملكوا حوالي 25% من الاقتصاد المصري و داخلين فى علاقات مباشرة فى بيزنس مع رموز النظام.. يعني حيحاكموا نفسهم يعني !!!؟

فقد كوفىء الطنطاوي ومثله الجنرال عنان من جانب الجنرال شوارسكوف في نهاية حرب الخليج الاولى وبعد تدميرهم للقوات العراقيه بان سمح لهم بحرية التصرف بالمعدات العسكرية التي خلفها وراءه الجيش العراقى وظلت سليمة ولا استبعد انهم باعوها لدول افريقية وجنوا منها مبالغ كبيرة ثم احتفظوا بعوائدها في حسابات سرية خارج مصر . ولا ننسى ايضا ان الولايات لا تقدم مساعدة عسكرية لمصربمبلغ مليار دولار سنويا الااذا ضمنت ولاء جنرالات الجيش المصري للنظام الذي يخدم مصالحها ويوفر الامن والاستقرار لاسرائيل كما نذكر ان الفريق عنان وهو احد اعضاء المجلس العسكري كان في واشنطن قبل يومين من تنحي حسني مبارك *

*http://www.alrakoba.net/articles.php?action=show&id=5389

مش عارفة ليه عمالة أفتكر حرب الخليج الأولى و الشباب المصريين اللي ماتوا .. يعني مصر كانت بتحمي الكويت بس ما قدرتش تحمي العراق فى 2003 و لا حتى تساعد الثوار فى ليبيا عشان تسيب أمريكا بس تتحكم فى نفط ليبيا..ده كله يبينلنا انه منطقى جداً أنه يتم ضرب و قتل المتظاهرين عند السقارة الاسرائيلية ..اومال المجلس الأعلى حياكل جاتوه و بزلاء منين ؟؟

برضه فكرة قرطسة الشعب المصري فى موضوع التعديلات .. يا ولاد الذين دي ثورة مات فيها شهدا يعني مش نسخة تجريبية لثورة .. تقوم تقسم الشعب نصين .. الفريق الأخضر نعم و الفريق الأحمر لأ .. و بعد ما الفريق الأخضر كسب .. تروح مقرطسه و منزله اعلان دستوري هو دستور 71 بس عمل رجيم فخس شوية ...

فى الآخر خلينا نفتكر أنه النظام اللي حاكمنا من 52 هو نظام عسكري و مش بسهولة حيتخلى عن مكاسبه و أننا لازم نبقى فايقين و ما نتقرطسش اكتر من كدة ..

قاللوا الجيش زي السكر... برضه العسكر هما العسكر