بغير علم الوصول

تسألنى فأنفى

تواجهنى فاراوغ

تلومنى فاكذب

ها أنت تعتصرنى الان

لا اريد ان اخسرنى أكثر من ذلك

أرجوك ارحمنى, لا أريد ان اجرحك

هل اجرحك؟ هل كونى أنا يؤلمك و يعذبك؟

لا أستطيع ان اكون ما تتمنى

لست جميلة و لا ذكية و لا محبوبة

ولكن لى روح لها وجود و اختيارات , فلماذا تحرمنى منها؟

ما ذنبى ان اناساً اخطأوا أو انت نفسك اخطائت

ارحمنى فأنا لا استطيع ان اكذب عليك

ولا أستطيع الا ان اكذب عليك

وعندما اكذب عليك اكذب على نفسى لانى انكرنى كى اثبتك و اثبت لك انك لم تخطء اتجاهى

اعلم انك تعلم انى اخدعك

لقد كررتها لى مرات عدة

"اعلمى انك لن تخدعينى وانى اثق فيكى و سأعلم ان خدعتنى"

اعلم انى افقد ثقتك تدريجياً هذا ان تواجدت من الأصل

اتركنى اخطأ و اتعثر

اتركنى اجد لنفسى منفذاً اخر

قلت لك من قبل

" لن أكون انت ... حياتى لن تكون مثلك"

و كم المنى ذلك و حرمنى النوم اياماً

كل يوم كنت اكره تلك السلطة التى منحتك اياها السماء و لكنى احبك

احبك بدون الصولجان و انت نازل من عرشك و قلعتك التى تحكمنى من خلالها

اعلم انى اشبهك كثيراً و لكن هناك اختلافات بيننا فراعيها فأنا لست نعجتك المستنسخة

و فى النهاية اريدك ان تعلم انى اكذب عليك لكونى صادقة

صادقة مع رؤيتىالتى أحاول ان انبهك لها

لا أكذب الا كى احميك من صدمة كونى عاصية أو كونى من تكرههم اجمعين

و اخيراً احبك جداً جداً جداً

عندما قالت لى: أنا ساقعانة عشان بقالى 15 يوم فى الشارع

جلست بجوارها , كانت ترتعد بجشدها الصغسر و عمرها الذى لا يتجاوز العاشرة أعوام ,ٍسألتها "مالك يا حبيبتى؟" قالت لى"انا ساقعانة نظرت اليها نظرة دهشة فهذا اليوم كان من أدفأ أيام شهر نوفمبر المتقلب,و أظن أنها تفهمت دهشتى فسارعت بالتبرير"أصلى بقالى 15 يوم ببات فى الشارع"و هنا تـاكدت أنها جزء من المشكلة التى ذهبت للمحافظة لتغطيتها صحفياً بالنيابة عن صديقة

لم أكن أعلم أى شى عن ما أنا ذاهبة اليه , كل ما علمته من صديقتى أن هناك مجموعة من سكان منطقة القبارى قامت المحافظة بهدم منارلهم

تحمست للذهاب هذا كل ما فى الأمر

الصحافة جت : هلل أحد الأفراد عندما رأنى أخرج الكاميرا من الحقيبة ,لم أجد ما أقول سوى " ما تقلقوش يا جماعة ",لا أعرف لما قلت تلك الكلمة التى أكرهها و أعلم أنى لا أقولها سوى عند علمى بأنه ليس نيدى شئ

جلست بجوار سيدة مسنة و لكن يملأ عينيها التحدى و قررت أن اسأل السيدة عن أصل المشكلة الى أن ياتى باقى الأصدقاء," هو ايه الحكاية بالضبط يا حاجة؟", قالت لى :" ولاد ال.... هدوا بيوتنا فو قينا و رمونا فى الشارع", سالت:"هدوها ليه يا حاجة ؟" قالت لى :عشان يو سعو المينا.

طيب و يا حاجة مش حيدوكو مكان تانى؟, قالتلى ماهوم مس عايزين يدونا أى حاجة, رحنا لرئيس الحى قالنا " اتحرقوا و أنا مالى و الموظفين انخدوا فلوس كتير و احنا غلابة , ده من يومين مات أنو المحامى بتاعنا من الساقعة و لما المحامى قال للأمن أنتوا اللى موتوا أبويا, قالولوا ما يموت ولا يروح فى ستين داهية.

مشيت قليلاً بين الناس الى أن أتى أصدقائى. و عندما أتى أصدقائى قررنا أن نذهب معهم الى مسكنهم أو ما كان مسكنهم

ذهنت لأول مرة فى حياتى الى تلك المنطقة ظنت انى فى الأراضى المحتلة , عربات أمن مركزى كثيرة و بلدوزرات تتهادى و هى تهدم و خيام مصنعة من المشمع و ناس فى الشارع تحت المطر.

سألت : ايه الحكاية بالضبط , جاوبنى شخص" فى شهر يونيو اللى فات اتفجأنا ان فيه حصر للناس و كل الناس فى الشغل و حصل حصر عشوائى فيه غش من الموظفين, سالنا ليه قالولنا أصل المينا اشترت الأرض عشان توسع المينا و دفعت 60 مليون جنيه هما فين , الله أعلم

المهم ودوا ناس مننا مدينة عبد القادر اللى بابظة و ناس مو دهوهاش و احنا ناس غلابة و فى ناس معهاش م يثنت أنهم كااوا ساكنين عشان دى عشوائيات بقالها فوق ال40 سنة.

قررنا أن نذهب الى مدينة مبارك _الله يحرقوا_فى عبد القادر , استقلينا أتوبيس و قلنا له " لما نوصل قلنا"ز ترجلنا من الأتوبيس لنجد أمامنا مدينة جميلة و لكن ليس نها شخص واحد و علمنا أنها ملوكة للقوات المسلحة و أن المدينة الأخرى التى سكن فيها الناس على بعد 5كم

أخيراً وجدناها, الناس فى الشارع و ينامون و يأكلون و يشربون, "ليه أنتوا مش فى شققكوا؟"جاوب أحد الأفراد " ليه أنتوا عايزينا نموت؟, دى الشقق كلها بتنزل مية و سلوك الكهربا عريانة. ده احنا لسة دافنين ست اتكهربت وفى عيلين فى المستشفى بين الحيا و الموت

دخلنا أحد الشقق وجدنا سيدة مسنة تجلس بيا أوانى مملوئة نالماء الذى يتساقط من السقف "لو جيتوا كمان يومين حاكون مت" قالت لنا السيدة المسنة و هى تبكى

ذهبنا لشقة أخرى, فال لنا أحد الواقفون" أنا هاين عليا اقتل ولادى من الذل اللى شايفينه , بس خايف من ربنا" رد اخر " لو اسرائيل دخلت ححارب معاها , دى مش بلدى"و وافق الجميع على ما قاله

قال اخر " مس كتر خيرنا أن احنا ماطلعناش على الاغنيا و سرقناهم وقتلناهم" " هذا حقك " اجبته

و نحن مغادرين , هربنا السكان من الضباط لأنهم لا يريدون أى فرد أن يعلم بتلك المهزلة حتى لا يتقلب الرأى العام ضدهم _اللى هو أصلاً مقلوب

ولا يزال الوضع على ماهو عليه و لا يزال يموت العديد و لا تزال هى سقعانة عشان هى مالهاش بيت

صورة الذكريات

هل نحن ننتهى من حيث بدأنا؟

هل بعد أن تختفى أشياء من حياتنا تظهر مرة أخرى كما هى و بدون تغيير؟

هل حياتنا دائرة مغلفة بالأحلام و الذكريات؟

كل هذا خطر ببالى عندما كنت فى زيارة لصديق ووجدت على حائطه صورة لأحد الأشخاص كنت دائماً اسمع عنها و انا صغيرة و أرى صو رتها معلقة على الحوائط المحيطة بى فى كل مكان

لم أكن أعرفها شخصياً , كل ما اعرفه عنها انها انتحرت بسبب احباطها من قسوة و ظلم عالمنا

عاودنى نفس أحساس الطفولة عندما رأيتها على الحائط مرة أخرى بوجهها البشوش و ابتسامتها الملائكية الهادئة

هى باقية منذ طفولتى بنفس ملامحها و نظراتها أما انا فتغيرت كثيراً , و لكن الاحساس الذى راودنى هو نفس الاحساس الذى راودنى عندما رأيت صورتها للمرة الأولى فى طفولتى رغم اختلافى التام و تغييرى الجذرى

عند هذه النقطة أيقنت أننا ننتهى من حيث بدأنا

و ان هناك أشياء لا تتغير بمرور الزمن و بتغيرنا

وان حياتنا دائرة مغلفة بالأحلام و الذكريات

ما بعد السعار

لم أكن أريد أن أن أكتب عن هذا الموضوع خاصة بعد أن كتب فطاحل البلوجرز(مالك,وائل عباس,شرقاوى ) عن تلك الحادثة , ولكن ما دفعنى للكتابة حول تلك الكارثة هو أنى قررت أن أتناقش مع اصدقائى عن تلك الحادثة.

الموضوع هو ما اسماه وائل عباس حالة السعار الجنسى الجماعى و لقد كان واحداً من شهود العيان لتلك الكارثة

هذا السعار الجنسى الذى أصاب مجموعة من المواطنين فى وسط البلد فى القاهرةو التفوا حول بعض الفتيات و تحرشوا بهم جنسياً لحد لم يسبق لى أن رأيته من قبل

ومن خلال مناقشاتى مع أصدقائى وجدت أن العديد منهم تعرض لمحاولات تحرش , فى البداية ظننت ان ما يقصدونه هو تلك الالفاظ النابية التى يطلقها البعض فى الشارع ولكنى علمت ما يقصدونه هو الملامسة و ظننت للمرة الثانية أن ما يقصدونه هو الملامسة الخفيفة و لكنى صعقت عندما علمت أن الملامسة وصلت الى حد التفعيص و محاولات نزع الملابس

و تذكرت مسهد روته عائلتى لى عن عائلة أجنبية مكونة من أم و أب و ابنتهما كانوا فى وسط الاسكندرية و تجمع حولهم مجموعة من الذئاب الجائعة و ضيقوا الخناق حولهم و تحرشوا بالفتاة و كانت الفتة مذعورة و أبويها مرعوبين . و كان ÷ولئك الذئاب فى أعداد كبيرة

الأهم من كل تلك القصص هو الأسباب , اختلف الناس حول الأسباب فالبعض القى اللوم على المتحرشين و اخرون رأوا ان المشكلة فى المتحرش بهم و لكن الجميع اتفق على أن اساس البلاء هو النظام الذى يحكم كل من المتحرشين و المتحرش بهم

ذلك النظام الذى يتعامل مع رعايه على انهم حيوانات يسوقونهم مما جعلهم يتحولون بالفعل الى حيوانات , حيث انه من المؤكد أن هؤلاى الجياع ليسوا جياعا جنسياً فقط بل جياع اقتصادياً و اجتماعياً أيضاً

فهم ليس لهم مصدر رزق و ليس لهم حقوق فى ذلك الوطن, فهم مضغوطون

أنى لا أدافع عنهم _ مع حقهم فى الدفاع عنهم_ أو اختلق لهم اعذار و تبريرات فهم مخطئون و لكن الاهم من اتهام الاشخاص هو محاولة العلاج حتى لا يتفشى الوباء_ وهذا ما أظن أنن تأخرنا فيه_فى المجتمع المصرى

العلاج لن يأتى سوى بالتغيير , ولا أقصد بالتغيير تغيير النظام الحاكم فقط الذى يعتبر أساس البلاء و لكنى أقصد تغيير المنظومة الفكرية أيضاً التى تتحكم فى المجتمع المصرى ككل الذى يتعامل مع المرأة على أنها جسد فقط أو عورة تمشى على رجلين

و يجب أن يتم تغيير النظام الحاكم ككل الذى يتعامل مع المواطنين على أنهم عينات بكتيرية ليس لهم أى فائدة و لا أهمية و بالتاى ليس لهم أى حقوق فى الحياة فتحولت تلك العينة الى مستعمرة بكتيرية تتكاثر و تزحف الى أن تهاجم كل ما حولها و تهاجم نفسها فى النهاية

هذا ما حدث مع المجتمع المصرى الذى يعتبر صاحب أعظم حضارة قديمة و مهد الأديان

تلك الأفعال حدثت من شعب قال عنه أغلب العلماء من هيرودوت للمقريزى لجمال حمدان أنه شعب خانع و أنه لمن غلب و أنه شعب يخاف و لا يستطيع أن يقوم بأى حركة جماعية لقد نجحت الحكومة فعلاً فى تشتيت غضب المواطنين عن أحوالهم الاجتماعية و الاقتصادية و تحويله الى حالة من السعار أصابت جزء من المواطنين و جعلتهم يرتدون الى طور الانسان البدائى

و لكن قد حان الوقت أن يواجه المجتمع المصرى الراضى بوضعه الحالى و يقوا " اللى نعرفه أحسن من اللى ما نعرفوش"أن اللى نعرفه لا يوجد اسوء منه وأن اللى ما نعرفوش هو ما نتوهم سوئه لنبرر صمتنا

أن المواطن الذى هتكت عرضه الحكومة فهتك عرض الاخرين كرد فعل يجب أن يوجه رد فعله لمن ظلمه فيحصل على حقه و يصون حقوق الاخرين

الرائعون

أراهم فى كل مكان فى وطننا , سمر الوجوه بابتسامة عريضة , يتساقط العرق من جباههم

رائعون تلك هى الكلمة الوحيدة التى استطيع أن اصفهم بها

يتحملون الكثير , صابرين , مثابرين , لديهم قدرة عجيبة على تحويل أحلك المواقف الى نوادر

أعلم أنهم تغيروا بمرور الزمن , و لكن العالم كله تغير فلماذا لا يتغيرون؟

أنهم اكثر من يرون العذاب , انهم أول من يدهسون عند أول تحول تاريخى

انهم بالنسبة للأقلية الحاكمة سوى أعداد من الهاموش ليس لهم أى حقوق سوى سرقتهم

أما المثقفون و عدد من المهتمون بالتغيير فيرونهم سلبيون , خائفون

أما هم انفسهم فيرون نفسهم ضعفاء , مفعول بهم , ليس لهم أى حقوق فى ذلك الوطن سوى أن يخافوا على أرزاقهم التى تسلب منهم , و على مستقبل أولادهم الذى لم يبدء بعد

أما نحن , فأين نحن؟ , نحن الذين نؤمن بالتغيير , نحن الذين لا نتحمل أى مسئولية سوى مسئوليتنا تجاه هؤلاء الرائعون يجب أن نتحمل ذلك القدر أو تلك الصدفة التى جعلتنا قادرين على رؤية أشياء لا يراها باقى الناس

فهل نحن قادرون على مساعدة الأغلبية المطحونة أن ترى النور و ترقص تحت الشمس؟؟ أليس ذلك حقهم

أمطار

لها مفعول السحر عليا تلك النقاط النقية التى تتساقط من السماء فتجعل شعرى مبلل و يتساقط منه الماء

اسعد لحظات حياتى الفردية هى عندما تمطر السماء و أجد جميع من حولى يهرعون للاختباء و ابقى وحدى فى الشارع , اشعر و كأنه ملكى أنا فقط

ارقص و أغنى تحت المطر و اشعر و كأنى عدت لطفولتى التى جزء كبير منها قضيته بعيداً عن المطر و جزء صغير قضيته تحت المطر و الثلوج

اسعد لحظات حياتى الفردية عندما تمطر السماء و يكون الجو قارص البرودةو أنا ارتدى ملابس خفيفة فاشعر بأوصالى ترتعد و انتفض و أسنانى تصطك و لكنى أكون مبتسمة

أسعد لحظات حياتى الفردية عندما تمطر السماء فى الليل فاقف تحت المطر بقرب عواميد النور أراقب بوضوح نقاط الماء تتراقص على نور المصباح

أسعد لحظات حياتى الفردية عنما تمطر السماء ... نعم أنها أسعد لحظات حياتى

مهما كنت مكتئبة أو حزينة عندما أرى الأمطار الغزيرة أشعر بالابتهاج و الفرحة

عندما اشعر بالبرد يسرى فى أوصالى اشعر فى تلك اللحظة فقط أنى من عداد الأحياء

تداخل

تللك المشاعر التى تكتنفنا فى بعض الأحيان و لا نعرف ما كنهها ،كيف تترك ذلك الأثر العميق فينا ، تلك المشاعر المختلطة هى فى أغلب الأوقات أكثر المشاعرالتى تترك علامات و آثار أو حتى جروح فى روحنا

لا أعرف .... عندما تنتابنى تلك المشاعر أياً كانت نوعها , شكلها أو اتجاهها اشعر و كأنى اعيد اكتشاف نفسى أو بالأحرى اكتشف نفسى كما لو كنت عارية أمام مرآة الحمام أزيح البخار فتنجلى صورتى الحقيقية بلا رتوش ،بلا تجميل ، بلا زيادة أو نقصان

تلك المشاعر التى دائماً ما تأتى بلا سبب واضح او بسبب تافه تجعلنى أشعر و كأنى نبية منزهة

تلك المشاعر التى مهما كانت محبطة أو سيئة تجعلنى اشعر و كأنى ملاك فقد جناحيه فقرر البقاء و الاستمرار على الأرض

غالباً لا تستمر تلك المشاعر و الأحاسيس فترة طويلة ولكنى دائماً أعلم أنها فى اقرب فرصة ستعود............... لتجعلنى عارية و نبية و ملاك

آه يا نوم يا نوم يا نوم ..... الله الله

نوم طويل .. أطول نوم حتنامه, فكرت فيه يا ترى حيبقى شكله ايه؟ يا ترى حاحلم فيه؟ ولا حاشوف البلاوى الزرقة اللى عملتها فى الناس؟

يا ترى حاحس باللى صاحيين؟ولا مش حابقى فاضية غير للأنا فيه؟

يا ترى اللى فوقيا حيفتكرونى و لا حينسونى؟ حيشتموا فيا و لا حيتخانقوا بسببى؟

يا ترى أنا اللى حنام الأول و لا حد تانى؟

يا ترى تحت حيبقى لونه ايه؟ أسود و لا روز و منور و فيه ورود و قلوب و اهداءات زى اللى فى عربيات الترام؟

هل ياترى سريرى حيبقى ضيق _ دى تبقى مصيبة أصل أنا عندى بدايات كلاستروفوبيا_و لا حيبقى واسع و اقر اعزم فيه صحابى الملايكة و الشياطين و نعمل بارتيتة استيمشن أو سيرجنت؟

طيب يا ترى أحداث حياتى حتكفى لغاية مالمنبه يضرب و اصحى و يجى دورى فى الطابور؟ ولا حيبقى فيه فقرات اعلانية فى النص و أغانى هابطة؟

و لو كنت شطورة و حلوة و باسمع الكلام حلاقى حاجات حلوة مصاصة و شوكولاتة و كده يعنى؟

ولو كنت وحشة و شريرة حتعاقب ازاى؟ يا رب ما يكونش بانى اشوف اجتماعات الحزب الوطنى أو اجتماع السيد الرئيس لبحث سبل النهوض بالشباب و الرياضة.

هو انا ممكن و انا نايمة اروح ازور الناس اللى بحبهم او ابص عليهم من بعيد يعنى ده حتى فى السجن فيه تصريح زيارة أصل مافيش أى مسجون فى أى نظام ديمقراطىمالوش زيارات

طيب حيبقى ليا محامى , اصل المتهم برئ حتى تثبت ادانته, و البينة على من ادعى و اليمين على من انكر

, انا باحلف بكل الأيمان انى كنت مش عارفة و باعمل الحاجة اللى انا فاكراها صح حتى لو طلعت غلط, بس اكيد الحكم حيطلع فى حيثيات الحكم انه لا يعتد بالجهل بالقانون

عشان كدة أنا عايزة أنام و ماقومش

بيان كان المفروض ينزل و ما نزلش

كل سنة و أنتم طيبين بمناسبة العام الدراسى الجديد , يا رب يبقى عام مفيد و نافع

كل سنة و أنتم طيبين بمناسبة رمضان

كل سنة و انتم طيبين بمناسبة مرور سنة على أول انتخابات مزورة فى تاريخ مصر بعد ما كانت استفتاءات مزورة برضوة

كل سنة و أنتم طيبين و الخصخصة شغالة فى البلد زى المنشار طالع واكل نازل واكل ى العمال و الموظفين الغلابة

كل سنة و أنتم طيبين بمناسبة مرور سنة برضوة على ارتفاع مصاريف الكليات و المدارس و الكتب , يا ترى ده له علاقة بانتخابات الرئاسة و برنامج السيد الرئيس اللى وعد فيه بالاهتمام بمحدودى الدخل؟

كل سنة و أنتم طيبين بمناسبة الغلابة اللى على قد حالهم اللى ماتوا ى قطر قليوب و ايتاى البارود و غرقوا فى عبارة السلام 98 وفنانينا اللى اتحرقوا فى بنى سويف, و عساكرنا اللى ماتوا على الحدود بنيران صديقة أطلقتها حليفتنا اسرائيل

كل سنة و انتم طيبين بمناسبة غلو السكر و السلع التموينية و البنزين اللى لما بيغلى بتغلى كل حاجة وراه

كل سنة و أنتم طيبين و بلدنا بقت عايشة فى حرية و ديمقراطية بسبب قانون الصحافة الجديد اللى بيودى ى داهية اى حد يعيب فى الذات الملكية , ولما حد يكشفتزوير الانتخابات يعنى يقول الحق يتلام و المزورين ما يتحسبوش لا يحاسبوا

كل سنة و انتم طيبين بمناسبة ان أمريكا بدأت تبارك مشروع التوريث

كل سنة و أنتم طيبين بمناسبة ان56 فى المية من الشعب المصرى بقى تحت خط الفقر

كل سنة و أنتم طيبين بمناسبة ان التأمين الصحى بدل ما حيبقى اجتماعى حيبقى تجارى , حتى العيا حيتجروا فيه

كل سنة و أنتم طيبين _ ودى يمكن الحاجة الوحيدة الحلوة السنة دى_ بمناسبة انتصار المقاومة الباسلة فى لبنان و يا شماتتنا فى البتاع ده

اخر كلام عندنا كل سنة و انتم طيبين و يا رب السنة دى تكون بداية سنة نهتم فيها بقضايا بلدنا و تكون السنة دى بداية شرارة التغيير

ارهاصات فكرية عن كينونتى-الخندق الثالث

لا أعلم فى أى الخندقيين أقف . فالذين فى الخندق الأول يرون انى من الخندق الثانى و الذين فى الخندق الثانى يرون أنى من الخندق الأول, وأنا لا أرى نفسى فى هذا و لا ذاك , اخترت ان ابقى فى المساحة الرمادية فيما بينهم فاصبحت مرمى لسهام الخندقين, كل منهما يرانى من الأعداء مع انى لست كذللك بالنسبة لكليهما

الخندق الأول يقف فيه الأخوة الدينيين أو الذين يؤمنون بوجود الله و يظهرون ذللك فى شكل طقوس و مظاهر و ظواهر و ما الى ذلك, وبما انى لا أرى أهمية كبيرة لتلك الشعائر و الطقوس فاذن انا من الخندق الثانى الذى هو خندق اللادينيين الذين لا يؤمنوا بالقوة الأعلى و بما انى ارى انه مهم بالنسبة لى وجود اله فانى بالتالى لست منهم أيضاً

طيلة حياتى كنت ارفض الدينيين بمختلف ديانتهم اولئك الذين يرون انهم وحدهم الذين يملكون الجنة ومعهم صكوك غفران تصك لمن فى ملتهم فقطو أولئك الختلفون عنهم فى جهنم و بئس المصير

وكنت استغرب من اللادينيين و قدرتهم على تخيل الحياة بدون وجود رب و رفضهم التام للدينين و رؤيتهم لهم على انهم ضعفاء و يتمسكوا باوهام ليست موجودة لتبرير ضعفهم و خوفهم و تحكمهم وكل مساؤهم

لقد قررت ان لا ادخل اى من الخندفين و ان لا احفر لى خندق ثالث, لن أكون طرفاً فى معركة لست لها مكاسب و خسائرها التسامح و التطلع لحياة افضل

ربما اموت باسهم أى من الخندقين ولكن حينها سوف اكون سعيدة لانى لم انزل تحت الارض ولكنى ظللت متمسكة بمكانى فوق الارض حتى رحيلى

سور العساكر العظيم

لماذا يقول المغرضون أن الحكومة لا تتمتع بحس فنى أو بذوق رفيع؟
لماذا يقولون أن مصر توقفت من زمن عن انتاج شئ يخلب العقول و يذهل العيون؟
لماذا هذا التجنى على حكومتنا الفنانة, الصالحة,الطيبة,الرؤوفة, الرحيمة,اللئيمة_سورى دى تحذف من المضبطة_ .

بقى يا مفتريين انتوا ما شوفتوش السور العظيم الأسود اللى بيلمع اللى الحكومة بتعملوا كل ما شوية غوغاء يحبوا يعملوا مظاهرة ,سور ممكن يصل طوله 2 كم, لو حد حب يدرس شكل مستعمرة النمل ممكن يبص على شكل العساكر وهما بينزلوا من عربيات اللى لماهم مش عارفة ازاىبينزل من العربية الولحدة 100 غسكرى ولا أكتر ؟ تقريباًجايبيين عساكر بتتطبق

لماذا يتهم البعض الحكومة بعدم الاهتمام بالأطفال و بالترفيه عنهم؟

ايه ما شوفتوش فتحى يا وردة اللى 500 عسكرى بيعملوها حوالين 15 متظاهر اهم بيسالوهوم بدل ماهما قاعديين يطالبوا بحاجات هابلة

لماذا يتهم البعض الحكومة بعدم الاهتمام بالرياضة ولا بالرياضيين؟

ده كفاية الجرى و الوثب اللى بيعملوه المتظاهريين

و لمواكبة العصر دلوقتى بقى فيه فرق كارتيه عاملها الحكومة علشان تعليم الدفاع عن النفس

لأ بجد اخص عليكوا اخص شعب ناقص تربية

واحد شاورما =..................

وجدتها ..... حتة اكتشاف يا جدعان ايه ما تقولوش لعدوكم عليه

صرح مصدر مش مسئول _اللى هو أنا_ان فيه علاقة بين الذكاء و الشاورما

اه والله شوفتوا ده طبعاً بعد التجارب العظيمة اللى عملتها عليا, المهمالنتيجة دى طلعت بيها ازاى ؟

بكل بساطة كنت قاعدة مع واحدة صاحبتى اول مرة تاكل عند "هوهو" المطعم الشهير قدام المجمع , قامت جت سألتنى :ايه اخبار الشاورما هنا؟ قولتلها : الحمدلله , قالتلى : لأ يا غبيةقصدى هو طعم الشاورما هنا حلو؟ قولتلها معرفش أصل أنا لما باجوع ما عرفش أنا باكل ايه, يعنى لو باكل ممبار حقوللك الكرواسون ده تحفة جعانة بقى , قالتلى طبعاً ما انت غبية

طلعت من ده بايه بان 1 شاورما =2 غبية

و حيث أن 1 شاورما =2غبية

اذاً 2 شاورما = 4 غبية

تخيلوا بقى لو كانت سألتنى عن الكوردون بلو كنت حبقى كام غبية بردوا فروق طبقية

شط اسكندرية أبو 5 جنيه

ايه اللى بيحصل فى البلد دى, بقت حاجة تقرف, فقير مالوش مكان فى البلد دى لأ وكمان مالوش كرامة

البوست ده انا حاكتب فيه عن مشهد حكاهولى صديق, مشهد عادى اكيد بيتكرر كتير ويمكن تكون شفت زيه او حتى اصعب منه

الفكرة بس فى الحكاية اللى انا حقولها دى انها بتثبت ان الانسان المصرى عايش من غير امل حتى لو كلن عنده فى يوم من الايام الاحساس الغريب ده اكيد بيضيع منه

المهم الحكاية ن مدى تحكم الفلوس فى ابسط احلم الغلابة

اتخنقتوا خلاص الحكاية كلها ان على احدى شواطئ الاسكندرية(اللى بقت كلها بفلوس) صاحبى ده و هومعدى شاف عيلة مكونه من اب و ام واطفالهم واضح عليهم انهم من الارياف كانوا عايزين ينزلوا البحر, المفاجأة اللى قبلتهم ان رسم الدخول للفرد 5 جبيه يعنى بحسبة بسيطة لو دول عيلة ضغيرة شوية يعنى مثلا اب و ام و 4 ولاد حيدفعوا 30 جنيه والله أعلم الراجل ده ممكن يكون فى جيبه المبلغ ده ولا عمره ما شافه ده غير ان اكيد فى جوه ايجار الشمسية واحتمال العيال يشبطوا فى بتاع الفريسكة ولسه كمان مواصلات يعنى اليوم حيقف عليه تقريبا ب 50 او 60 جنيه

العيلة دى لما معرفتش تدخل اعدوا على الرصيف بره كلهم يعيطوا بما فيهم الاب

ايه القهر ده كله تخيلوا احساس الاب قدام ولاده ايه انه مش عارف يخليهم ينزلوا البحر

يا جماعة دى مصيبة, اسكندرية مفيهاش غير شاطئين بس مجانا و مش مجاناً اوى يعنى فيه ايجار شمسية و كراسى والذى منه

يعنى الراجل ده بكل ما يمثله من طبقة و شريحة فى المجتمع يعمل ايه

و بعد كده يقولك الحكومة عايزة مصلحة البلد و عايزه تخلى كل محافظات مصر سياحية

المصيبة ان اللى ساكنين مصر مش سياح يا بشوات دول غلابة منقوعين فى طين البلد اللى انتوا عايزين تجرفوه عشان تعملوا شاليهات فى مارينا

هى

اراها فى كل شئ جميل حولى اراها فى كل احلامى الوردية اراها كيمامة كسرت طوقها وطارت

يظنون انى اشبهها ولكنى لست مثلها, هى تفعل كل ما يمليه عليه ضميرها, هى مناضلة عملية تذرع الشارع جيئة وذهابا تساعد كل من يحتاجها

دائما متواضعة ولكنها واثقة من نفسها, صادقة, ودودة, حنونة, بسيطة

تساعدنى دائما عندما افقد الثقة فى نفسى, تقربنى دائما من المحتاجين, تعرفنى على ما لا اعرفه فى الحياة

تعطينى امل بكل نكاتها التى تحفظها عن ظهر قلب

نجلس فى شرفتها نتسامر ونضحك, نخترع ونناقش, نلعب كل الالعاب التى اكون محرومة منها

نقرأفى مكتبتها العامرة بجميع صنوف الكتب سياسة, تاريخ, فن, أدب, علوم كل شئ نأكل ما تقدمه لنا من اطعمة خاصة محشى الكرنب والفسيخ

بالصدفة انا و هى نحمل نفس نهاية الاسم, لكنها ذهبت وانا لم اذهب الا نستطيع ان نبدل الاماكن؟

أحياناً

فى أحيان كثيرة يتملكنى اليأس من كل ما حولى, من الفساد , من الفقر , من سكوت الناس على حقوقهم ولكنى دائماً ما أجد سبباً يجعلنى استمر فى المقاتلة او المحاولة الحثيثة للخطو نحو السطح الدى اظنه اكثر اشلراقاً

كل هذا لا يأخذ منى وقت فا اذا يأست من شىء خارجى فانى اقنع نفسى بامكانية تغييره , ولكن ما لا أستطيع تغيره هو الشىء الوحيد الذى املكه نفسى

فعندما ايأس من نفسى أجد بصعوبة المنفذ للخروج و الصعود من بؤرة الاحباط

ما اعرفه فقط هو انه يجب ان استمر فيما أظنه صحيحاً ً, فيما اعتقد انه سيساعد المطحونين , لا أعلم اذا كان ذللك ما يريدونه أم أنه فقط وهم اتمسك به لاعطاء معنى لوجودى غير المبرر فى هذا الكون اللامتناهى

لا اعلم هل ما اكتبه هذا سوف انشره أم لا؟

فا اذا نشرته انى اعلم عندما اقرأ هذا البوست سوف اضحك من كل قلبى على تلك الاهترائات الخزعبليةالتى تنتابنى أحيان قليلة و لكنها تقلبنى رأساً على عقب

فسوف أكون وقتها قد وجدت سبباً ما لوجودى فى هذا العالم

شاطر و مشطور و بينهما أنا

عمرك حسيت احساس الزبدة بالمربى بين التوست_معلهش اصل انا هاى كلاس_ ممكن للتبسيط برضوا انه يكون احساس الجبنة القريش فى العيش

أو حتى احساس الطماطم فى برطمان الصلصة من الاخر احساس التينة اللى فى نص قفص التين.

اهو ده بقى بالضبط احساسى دلوقتى

انا فاكرة زمان لما كنت بسمع منير بيقول "و الدنيا دى رحاية" كنت باستغرب, بس أخيراً اكتشفت أن المشكلة مش فى الدنيا المشكلة فى الناس

كل واحد طالب منك حاجة غير انك نفسك طالب من نفسك حاجات, فبتبقى محتار ترضى الواحد ولا ترضى نفسك. المشكلة ان دى الصورة السهلة لكن لو بصنالها من وجهة نظر اكثر تعقيداً حنلاقى انك محتار ترضى اتنين او تلاتة او حتى مليون ولا ترضى نفسك

و ده كله فى الاخر بيؤدى الى انك تاخد حلول وسط, المصيبةبقى انك الوحيد اللى بتبقى حاسس أنك ضحيت اما الناس التانيين بيبقوا شايفينك ندل لأنك اديتهم نص أو ربع أو ثمن اللى عايزينه مع ان فى الأساس لو كل واحد عمل اللى فى دماغه مش حيبقى محتاج حد

بس حاقول ايه ده دليل على ان الانسان أصله قرع.... علشان زيه بيمد لبره

ياللا هى جت عليا

اكتبى ...اكتبى...اكتبى.. كل ماحد يقابلنى يقولى :"ايه يا بنتى انت ما بتكتبيش ليه؟".. "ايه فين البلوج بتاعك؟".. "يا بنتى لما تيجى تشتركى معايا فى البلوج بتاعى أو اكتبى حاجة و انا حابعتهالك للجورنال اللى بكتب فيه

اهو ادينى بكتب اتبتطوا.

قال يعنى حطلع درر بلا خيبة .. مش كفاية خطى وحش _لا مؤاخذة مش باين

بس على العموم انا بكتب عشان عدة أسباب منبعجة من شعورى الانسانى المتازم بسبب العصر الكومبرادورى الأول الذى نعيشه..

من الاخر أنا بكتب عشان أنا مخنوقة.

يجى واحد و يقولى يا كابتن لطيف مخنوق من ايه؟؟ اقوم أنا ردة عليه و قايلة له و انا اش عرف اللى جابونى. ماهو انا لو كنت عارفة ما كنتش حضبع وقتى فى الكتابة وكنت أكيد حاقوم زى الشطورة احل مشاكلى

بس ياللا مش مهم حظكوا الأسود خلانى أضايق من حاجة انا مش عارفاها فاكتب

بس تصدقوا الفكرة عجبتنى _دا انتوا حظكوا اسود اوى_ شكلى حطلع النفسانة المتدارية فيا عليكوا بس معلش داه دائما دور القارىء المبتدأ مع الكاتب العظيم المشهور, عشان كدة كدة أنا بنصحكواتقفلوا البلوج وتروحوا تعملوا حاجة مفيدة, أى حاجة , تتنقاشوا فى الامبريالية الجديدة المتمثلة فى وسائل الاعلام أو فى دور المرأة البناء فى العالم الثالث ذو الطغيان الذكورى ... ولا أقولكوا روحوا استحموا أفيدلكوا